მომავალ კვირას ნატოს წევრი სახელმწიფოების საგარეო საქმეთა მინისტრები უკრაინის ტერიტორიაზე და მის საზღვართან რუსეთის სამხედრო ძალების გაზრდის საკითხზე იმსჯელებენ.

ამის შესახებ ნატოს გენერალურმა მდივანმა იენს სტოლტენბერგმა ბრიუსელში გამართულ ბრიფინგზე განაცხადა.

„ჩვენ ვხედავთ უჩვეულო კონცენტრაციას და ეს უკვე მეორედ ხდება წელს. ეს არის სამხედრო ზრდა იმ ქვეყნის მიერ, რომელიც მანამდე უკრაინაში უკვე შეიჭრა. ჩვენ ვხედავთ მძიმე შეიარაღებას, ტანკებს, "დრონებს" საბრძოლველად გამზადებულ ჯართან ერთად. ჯარების რაოდენობის ზრდა არანაირად არ იყო პროვოცირებული და ვერ აიხსნება“, - განაცხადა სტოლტენბერგმა.

მან რუსეთს მოუწოდა, დაწიოს დაძაბულობა საზღვარზე.

"თუ რუსეთი გამოიყენებს ძალას უკრაინის წინააღმდეგ, მას მოუწევს საფასურის გადახდა. ღრმად ვარ შეშფოთებული იმით, რასაც ვხედავთ და ვუზიარებთ ინფორმაციას მოკავშირეებს. გაურკვეველია რუსეთის განზრახვა, მაგრამ ჩვენ ვნახეთ, რომ რუსეთმა გამოიყენა სამხედრო ძალა უკრაინის წინააღმდეგ ადრე, როდესაც ყირიმის ოკუპაცია განახორციელა და დონბასის დესტაბილიზაციისთვის. ამას უნდა დავუმატოთ კიბერთავდასხმები და დეზინფორმაციის კამპანიები“ , - განაცხადა გენმდივანმა.