მოქალაქეების შეკრება სასამართლოსთან წნეხის ხასიათს ატარებს და შეიძლება პროვოკაციულიც იყოს,- ამის შესახებ საპარლამენტო უმრავლესობის წევრმა გივი მიქანაძემ განაცხადა, რითაც გამოეხმაურა "ნაციონალური მოძრაობის" მხარდამჭერთა აქციას საქალაქო სასამართლოსთან, სადაც მიხეილ სააკაშვილის სასამართლო პროცესია ჩანიშნული.
მიქანაძის თქმით, "ქართული ოცნების" ხელისუფლების პირობებში შეკრების თავისუფლება დაცულია.
"შეკრების თავისუფლება "ქართული ოცნების" ხელისუფლების პირობებში, განსხვავებით წინა ხელისუფლების პერიოდისგან, ყოველთვის არის უზრუნველყოფილი. საქმე, რაშიც კონკრეტული პირი არის მხილებული, არის სწორედ 7 ნოემბრის აქციების დარბევასთან დაკავშირებით, სადაც სწორედ ეს უფლება არ იყო გარანტირებული. რა თქმა უნდა, მოქალაქეებს შეუძლიათ საკუთარი პოზიციის თავისუფლად გამოხატვა და ეს უფლება ყოველთვის იქნება დაცული, თუკი ის კანონით განსაზღვრულ ფარგლებში იქნება. მოქალაქეების შეკრება წნეხის ხასიათს ატარებს და შეიძლება პროვოკაციულიც იყოს, ამიტომ მიზანშეწონილია სასამართლოს მივცეთ საშუალება, რომ თავისუფალ რეჟიმში ჩაატაროს პროცესი, რომელიც დარწმუნებული ვარ, კანონმდებლობის სრული დაცვით წარიმართება,"- განაცხადა მიქანაძემ.