გახსოვთ, შოთა უდიაშვილის მონაწილეობით, დააწყვეს ადამიანების ცხედრები „ბუტკებზე“, რისი შემოქმედი იყო მიხეილ სააკაშვილი, - ასე უპასუხა „ქართული ოცნების“ თავმჯდომარემ, ირაკლი კობახიძემ ყოფილი პრეზიდენტის, მიხეილ სააკაშვილის განცხადებასთან დაკავშირებით დასმულ შეკითხვას, რომლის თქმითაც, ერთადერთი ბრძანება, რომელიც 2011 წლის 26 მაისს აქციის დარბევის დროს გასცა, ტერიტორიიდან დემონსტრანტების გაყვანას ეხებოდა.

როგორც ირაკლი კობახიძემ ჟურნალისტებს განუცხადა, სინამდვილეში უმძიმესი ოპერაცია ჩატარდა, რასაც მოჰყვა ადამიანური მსხვერპლი.

„ეს არის ტყუილების კასკადი, სინამდვილეში ჩატარდა უმძიმესი ოპერაცია, რასაც მოყვა ადამიანური მსხვერპლი. რამდენიმე ადამიანი დაიღუპა, არა მარტო დაიღუპა, გახსოვთ, შოთა უდიაშვილის მონაწილეობით დააწყვეს ადამიანების ცხედრები ბუტკებზე - ეს იყო რეალობა და ამის ლიდერი და შემოქმედი იყო მიხეილ სააკაშვილი, როგორც სისხლიანი რეჟიმის მთავარი ხელმძღვანელი“, - განაცხადა ირაკლი კობახიძემ.