ირაკლი კობახიძე - მზად ვართ გავატაროთ ნებისმიერი რეფორმა რაც მნიშვნელოვანია ქვეყნისთვის და ევროპული ინტეგრაციისთვის - 2-3 წელია ველოდებით ფაქტებზე და მტკიცებულებებზე დაფუძნებულ წინადადებებს

როგორც კი ფაქტებზე და მტკიცებულებებზე დაფუძნებით წარმოგვიდგენენ კონკრეტულ წინადადებებს იმასთან დაკავშირებით, როგორ შეიძლება გაუმჯობესდეს სიტუაცია, მაშინვე გატარდება შესაბამისი რეფორმა,- ამის შესახებ პარტია „ქართული ოცნების“ თავმჯდომარემ ირაკლი კობახიძემ განაცხადა, რითაც გამოეხმაურა ევროკავშირის საგარეო სამსახურის პრესსპიკერის განცხადებას, უზენაესი სასამართლოს მოსამართლეების დანიშვნასთან დაკავშირებით.

კობახიძის განცხადებით, „ქართული ოცნება“ ევროკავშირთან თანამშრომლობისთვის, ქვეყნისთვის და ევროპული ინტეგრაციისთვის მნიშვნელოვანი რეფორმების გასატარებლად მზად არის „ჩვენ მზად ვართ გავატაროთ ნებისმიერი რეფორმა რაც მნიშვნელოვანია ჩვენი ქვეყნისთვის და ევროპული ინტეგრაციისთვის, რა თქმა უნდა, მზად ვართ ყველა ამ საკითხთან დაკავშირებით ევროკავშირთან თანამშრომლობისთვის.

რაც შეეხება კონკრეტულად სასამართლო რეფორმას, ჩვენ თავიდანვე დავსვით ეს საკითხი და კვლავაც არის დღის წესრიგში. როგორც კი ჩვენ ფაქტებზე და მტკიცებულებებზე დაფუძნებით წარმოგვიდგენენ კონკრეტულ წინადადებებს იმასთან დაკავშირებით, თუ როგორ შეიძლება გაუმჯობესდეს სიტუაცია, მაშინვე გატარდება შესაბამისი რეფორმა. თუმცა დღემდე გასულია 2-3 წელი, ველოდებით ასეთ ფაქტებზე და მტკიცებულებებზე დაფუძნებულ წინადადებებს რეფორმებთან დაკავშირებით. ჯერ არ შემოგვსვლია, იმედია შემოგვივა და ამის საფუძველზე განახლდება დისკუსია ნებისმიერ რეფორმასთან დაკავშირებით”, - განაცხადა კობახიძემ.

ევროკავშირის საგარეო სამსახურის პრესსპიკერმა უზენაესი სასამართლოს მოსამართლეების დანიშვნასთან დაკავშირებით განცხადება გაავრცელა.

განცხადების თანახმად, მოსამართლეთა ბოლოდროინდელი დანიშვნები ეწინააღმდეგება ამა წლის 19 აპრილის პოლიტიკური შეთანხმების ფარგლებში საქართველოს ლიდერების მიერ აღებულ ვალდებულებას მართლმსაჯულების ამბიციური რეფორმირების შესახებ, რაც მათ 28 ივლისს კიდევ ერთხელ დაადასტურეს. ეს მოიცავდა უზენაესი სასამართლოს მოსამართლეთა დანიშვნამდე კანდიდატების წარდგენის პროცესში არსებული ხარვეზების აღმოფხვრას. ეს ქმედებები შეიცავს საფრთხეს, რომ უფრო მეტი ეჭვის ქვეშ დადგება სასამართლოს დამოუკიდებლობა და საზოგადოების ნდობა ქართული მართლმსაჯულების მიმართ.

ევროკავშირი კიდევ ერთხელ იმეორებს მოწოდებას საქართველოს ხელისუფლების მიმართ, რომ ხელი შეუწყონ სასამართლო სისტემის, მათ შორის იუსტიციის უმაღლესი საბჭოს დამოუკიდებლობის, ანგარიშვალდებულებისა და ხარისხის განმტკიცებას, ფართო, ინკლუზიური და პარტიებს შორის შეთანხმებული რეფორმების გზით.

ევროკავშირი კიდევ ერთხელ აღნიშნავს, რომ მიუხედავად მისი მზადყოფნისა, სრულად დაუჭიროს მხარი ევროკავშირი–საქართველოს ასოცირების შეთანხმებით გათვალისწინებული რეფორმების განხორციელებას, საქართველოს დახმარება ევროკავშირის მხრიდან საკვანძო რეფორმების პროცესში მიღწეულ წინსვლაზე იქნება დამოკიდებული სასამართლო რეფორმის ჩათვლით.

თენგიზ ფხალაძე - დღეს თამაშის დრო ნამდვილად არ არის, 12-ვე ვალდებულება უნდა შესრულდეს და არა შესრულების ილუზია შეიქმნას, კანდიდატობის ვერ მიღება მხოლოდ ჩვენს თავს უნდა დავაბრალოთ და სხვას არავის
ქეთევან ჩაჩავა - აუცილებელია ყველაფერი გაკეთდეს, რომ საქართველომ ევროკავშირის კანდიდატობის სტატუსის მისაღებად წლის ბოლომდე „მეორე შანსი“ გამოიყენოს
ქართული პრესის მიმოხილვა 24.06.2022
უკრაინის დამოუკიდებელი ანტიკორუფციული კომისიის აღმასრულებელი დირექტორი - დრო ჩვენთვის სიცოცხლით იზომება, ჩვენ არც თუ ისე ტოლერანტულები ვართ ლოდინისადმი - ამ დროში ვკარგავთ ქვეყანას, რომელსაც რუსეთი წამებით კლავს
მცირე სახელმწიფო „ახალი წესრიგის“ კონტექსტში: ქართული ქეისი
Hotsale.ge-ის სპონსორობით საქართველოში პირველი ფინანსური ბიზნეს ფორუმი გაიმართა
დედაქალაქის ცენტრალურ გამზირზე მდებარე, საუკუნეზე მეტი ისტორიის მქონე სასტუმრო „თბილისი მარიოტი“ ბაზარზე სრულიად ახალი პროდუქტით - „პარკ გრილ“ რესტორნით შემოდის
ბოკერიას სახელობის საუნივერსიტეტო ჰოსპიტლსა და „ლიბერთი ბანკს“ შორის მემორანდუმი გაფორმდა