„ევროპული საქართველოს“ პოლიტსაბჭოს თავმჯდომარის გიგი წერეთლის განცხადებით, მიხეილ სააკაშვილი იმ სასამართლოს წინაშე უნდა წარდგეს, რომელსაც ნდობა ექნება და ამასთან, არაა აუცილებელი, რომ პროცესის მიმდინარეობისას პატიმრობაში იყოს.

როგორც წერეთელმა ჟურნალისტებს განუცხადა, სააკაშვილი პოლიტპატიმარია და „ეს ხელისუფლებაც დაადასტურა“.

„მიხეილ სააკაშვილი პოლიტიკური პატიმარია და ეს დაადასტურა ხელისუფლებამაც. ყველანაირი ეჭვი გაიფანტა მას შემდეგ, რაც პრემიერ-მინისტრმა ცნობილი გამონათქვამები გააკეთა და მიხეილ სააკაშვილის დაპატიმრება მის პოლიტიკურ მოღვაწეობას დაუკავშირა. როდესაც ორი მოცემულობა გაქვს - რომ გყავს პოლიტპატიმარი და არ გაქვს სამართლიანი სასამართლო, რაზე უნდა იყოს საუბარი. ეს მოდელი აბსოლუტურად შესაცვლელია.

სრულიად ვეთანხმები იმას, რომ მიხეილ სააკაშვილი უნდა წარდგეს იმ სასამართლოს წინაშე, რომელსაც ნდობა ექნება. აუცილებელი არ არის ის ასეთი სასამართლოს წინაშე წარდგეს როგორც პატიმარი. საფრანგეთის პრეზიდენტის მიმართ იყო სერიოზული ბრალდებები, მაგრამ მთავრობამ პატივი სცა პრეზიდენტის ინსტიტუტს და სარკოზი არ მოათავსეს საპატიმროში, არ ექცეოდნენ უდიერად და ჰყავთ შინაპატიმრობაში“,- განაცხადა გიგი წერეთელმა.