შეერთებული შტატები, ჩინეთში ადამიანის უფლებების დარღვევის გამო, პეკინის ზამთრის ოლიმპიადას დიპლომატიურ ბოიკოტს უცხადებს და ოლიმპიადაზე მთავრობის წარმომადგენლებს არ გაგზავნის.

„ბაიდენის ადმინისტრაცია არ გაგზავნის დიპლომატიურ ან ოფიციალურ წარმომადგენლობას პეკინის 2022 წლის ზამთრის ოლიმპიადასა და პარაოლიმპიადაზე იმის გამო, რომ ჩინეთის სახალხო რესპუბლიკა სინძიანში გენოციდსა და ადამიანის უფლებების სხვა დარღვევებს ახორციელებს,“- განაცხადა თეთრი სახლის პრესმდივანმა ჯენ ფსაკიმ.

მისი განმარტებით, დიპლომატიური ბოიკოტი, რომელსაც აშშ-ის კონგრესის ზოგიერთი წევრი და უფლებების დამცველი ჯგუფები თვეების განმავლობაში უჭერდნენ მხარს, არ იმოქმედებს ოლიმპიადაზე ამერიკელი სპორტსმენების დასწრებაზე.

"ამერიკის გუნდში სპორტსმენებს ჩვენი სრული მხარდაჭერა აქვთ. ჩვენ მათ 100%-ით დავუჭერთ მხარს და ვგულშემატკივრობთ მათ შინიდან”,- აღნიშნა ფსაკიმ.

გადაწყვეტილების გამოცხადებამდე ჩინეთის საგარეო საქმეთა სამინისტროს პრესსპიკერმა, ჩჟაო ლიცზიანმა განაცხადა, რომ ბოიკოტისკენ მოწოდება უნდა შეწყდეს, „რათა მან ჩინეთსა და შეერთებულ შტატებს შორის მნიშვნელოვან სფეროებში დიალოგსა და თანამშრომლობაზე გავლენა არ მოახდინოს“.

„თუ შეერთებული შტატები ჯიუტად განაგრძობს თავის კურსს, ჩინეთი მკაცრ საპირისპირო ზომებს მიიღებს“, - აღნიშნა ჩჟაო ლიცზიანიმ.