აშშ-ის სახელმწიფო მდივან, ენტონი ბლინკენსა და უკრაინის პრეზიდენტ, ვლადიმერ ზელენსკის შორის სატელეფონო საუბარი გაიმართა, - ინფორმაციას აშშ-ის სახელმწიფო დეპარტამენტი ავრცელებს.
„პრეზიდენტ ბაიდენისა და პრეზიდენტ პუტინის დისკუსიის წინ, სახელმწიფო მდივანმა ბლინკენმა დაადასტურა შეერთებული შტატების ურყევი მხარდაჭერა უკრაინის სუვერენიტეტის, დამოუკიდებლობისა და ტერიტორიული მთლიანობის მიმართ რუსული აგრესიის ფონზე. მხარეები შეთანხმდნენ დონბასში კონფლიქტის მშვიდობიანი, დიპლომატიური გადაწყვეტის აუცილებლობაზე და უკრაინის სუვერენიტეტის სრულად აღდგენაზე მის საერთაშორისოდ აღიარებულ საზღვრებზე, ყირიმის ჩათვლით,“- აღნიშნულია ინფორმაციაში.
შეგახსენებთ, რუსეთის პრეზიდენტი ვლადიმერ პუტინი და აშშ-ის პრეზიდენტი ჯო ბაიდენი დღეს, ვიდეოკონფერენციის ფორმატში, დიალოგს გამართავენ. ცნობილია, რომ საუბრის ერთ-ერთი მთავარი თემა უკრაინის საკითხი იქნება.