საფრანგეთში ორი მამაკაცი დააკავეს, რომლებიც შობის დღესასწაულზე ტერაქტებს გეგმავდნენ. ამის შესახებ BFMTV გამოძიებასთან დაახლოებულ წყაროზე დაყრდნობით იუწყება.

გამოცემის ინფორმაციით, დაკავებულები გეგმავდნენ დანით მიეყენებინათ ჭრილობები შემთხვევითი გამვლელებისთვის განსაკუთრებით ხალხმრავალ ადგილებში.

ამავე ინფორმაციის მიხედვით, ორივე პირი სამართალდამცავებმა 29 ნოემბერს ილ დე ფრანსის რეგიონში დააკავეს. თუმცა, ამის შესახებ დღეს გახდა ცნობილი.

მათ ბრალი უკვე წარედგინა და წინასწარი გამოძიების ფარგლებში, პატიმრობაში იმყოფებიან.

მათი სახლის ჩხრეკისას ჯიჰადისტური ლიტერატურა და დაჯგუფება „ისლამური სახელმწიფოს“ პროპაგანდისტული მასალები ამოიღეს.