მიხეილ სააკაშვილის ბრალდების საქმე, რომელიც სახელმწიფო საზღვრის უკანონო კვეთას ეხება, სასამართლოს არსებითად განსახილველად გადაეცა
საქართველოს მესამე პრეზიდენტის მიხეილ სააკაშვილის ბრალდების საქმე, რომელიც სახელმწიფო საზღვრის უკანონო კვეთას ეხება, სასამართლოს არსებითად განსახილველად გადაეცა.
ბრალდების მხარის განცხადებით, მიხეილ სააკაშვილის მიმართ სისხლის სამართლებრივი დევნის შეწყვეტის საფუძველი არ არსებობდა, რის გამოც, აღნიშნული საქმე არსებითად განსახილველად სასამართლოს უნდა გადასცემოდა.
ადვოკატ ბექა ბასილაიამ კი აღნიშნა, რომ მიხეილ სააკაშვილი პოლიტიკური დევნილია და მიიღო გადაწყვეტილება, იმ ქვეყანაში დაბრუნებულიყო, რომელსაც 9 წლის განმავლობაში მართავდა.
ბასილაიას თქმითვე, ეს იყო პოლიტიკური აქტი და გმირული ნაბიჯი.
ადვოკატის განმარტებით, სააკაშვილის საქართველოში დაბრუნება სისხლის სამართლებრივი კატეგორიით არ უნდა შეფასდეს და რომ ყოფილი პრეზიდენტის გადაწყვეტილება იყო სახელმწიფოებრივი.
ადვოკატმა მოსამართლე ლელა კალიჩენკოს მიმართა, რომ მას პირდაპირი საფუძველი აქვს, სისხლის სამართლებრივი დევნა შეწყვიტოს.
„მიხეილ სააკაშვილის საქართველოში დაბრუნება არ შეიძლება შეფასდეს სისხლის სამართლებრივი კატეგორიებით, ისევე როგორც ვერ შეფასდებოდა ზვიად გამსახურდიას საქართველოში დაბრუნება სისხლის სამართლებრივ კატეგორიად, როდესაც დევნილი პრეზიდენტი დაბრუნდა საქართველოში 90-იან წლებში. უნდა ითქვას, რომ პროკურატურამ მაშინაც აღძრა საქმე ზვიად გამსახურდიას მიმართ. გავიდა მრავალი წელი და ვიცით, ზვიად გამსახურდიას წინააღმდეგ აღძრული საქმეები ისტორიულ კონტექსტში როგორ ფასდება; ვიცით როგორ ფასდება იმჟამინდელი პროკურატურის საქმიანობა და კარგად ვიცით გამსახურდიას როლი და ღვაწლი საქართველოს ისტორიაში როგორ ფასდება. იგივე ელოდება ამ საქმეს“,- განაცხადა ბექა ბასილაიამ.
პროკურორ თამარ იაკობიძის განცხადებით, ბრალდების მხარე მტკიცებულებებით საუბრობდა, დაცვის მხარე კი საქმის პოლიტიკურ ჭრილში გადატანას ცდილობდა.
საქმის არსებითი განხილვა 22 დეკემბერს 12:00 საათზე გაიმართება.
This is a modal window.
v-if="article.gallery" v-html="article.gallery"
