კორონავირუსის „ომიკრონ“ ვარიანტი ლონდონში დომინანტური უახლოეს 48 საათში გახდება, - ამის შესახებ გაერთიანებული სამეფოს ჯანდაცვის მინისტრმა საჯიდ ჯავიდმა განაცხადა.

მისი თქმით, კოვიდ-19-ის არცერთი ვარიანტი ასე სწრაფად არ გავრცელებულა.

„მიუხედავად იმისა, რომ „ომიკრონი“ წარმოადგენს შემთხვევების 20 პროცენტზე მეტს ინგლისში, ჩვენ უკვე დავინახეთ, რომ ის 44%-ზე მეტს აღწევს ლონდონში და ველით, რომ მომდევნო 48 საათში ის დედაქალაქში დომინანტური ვარიანტი გახდება,“- აღნიშნა მინისტრმა.

შეგახსენებთ, ჯანდაცვის მსოფლიო ორგანიზაცია აცხადებს, რომ კორონავირუსის „ომიკრონ“ ვარიანტი, რომელიც 60-ზე მეტ ქვეყანაშია დაფიქსირებული, „ძალიან მაღალ" გლობალურ რისკს წარმოადგენს.