გერმანიის ქალაქ მანჰაიმში აქციაზე, სადაც 2 000-მდე ადამიანი კორონავირუსის გამო დაწესებულ შეზღუდვებს აპროტესტებდა, სამართალდამცავებსა და აქციის მონაწილეებს შორის დაპირისპირება მოხდა.

„დოიჩე ველეს“ ინფორმაციით, დაპირისპირების შედეგად 6 პოლიციელი დაშავდა.

არასანქცირებული აქციის მონაწილეებს სამართალდამცავებმა განუმარტეს, რომ მსვლელობა შეეწყვიტათ, თუმცა მათ გაფრთხილება უგულებელყვეს, რის შემდეგაც პოლიციამ მათი დაშლა დაიწყო.

სამართალდამცავებმა 120-მდე ადამიანი დააკავეს.

გერმანიაში საპროტესტო აქციები სხვა ქალაქებშიც გაიმართა, 3 500-მდე ადამიანი შეიკრიბა მაგდებურგში, 2 900 - როსტოკში. შედარებით მცირე მასშტაბის აქციები გაიმართა ჩრდილოეთი რაინ-ვესტფალიისა და საქსონიის მხარეებში.