„ნაციონალური მოძრაობის” წევრის, გიორგი ბოტკოველის ინფორმაციით, რამდენიმე დღის წინ, „ქართული ოცნების” შეკრებიდან წამოსული კახეთის გუბერნატორი ირაკლი შიოშვილი საჭესთან ალკოჰოლური ზემოქმედების ქვეშ დაჯდა და სახელმწიფო საკუთრებაში არსებული ავტომობილი დააზიანა.

გიორგი ბოტკოველის ინფორმაციით, აღნიშნული ინციდენტის შემდეგ შიოშვილი თელავის კლინიკაში მივიდა, სადაც ექიმებს მოატყუა, თითქოს "კიბიდან დაგორდა და იქ მიიღო მცირე დაზიანებები”.

ბოტკოველი შინაგან საქმეთა სამინისტროდან შიოშვილისთვის ჩატარებული ალკოტესტის პასუხების გამოქვეყნებას ითხოვს.

„რამდენიმე დღის წინ კახეთში, ჭავჭავაძის რეზიდენციაში "ოცნებამ” და ლიდერებმა ჩაატარეს დიდი ღრეობა, სადაც შეკრებილები იყვნენ მუნიციპალიტეტების მერები და სხვადასხვა ჩინოვნიკები. ვნახეთ, როგორ ზეიმობდნენ იმ დროს, როდესაც მოსახლეობას ძალიან უჭირს. ამ ყველაფრის შემდეგ კახეთის გუბერნატორი ირაკლი შიოშვილი მთვრალ მდგომარეობაში წინანდლიდან წავიდა თელავში და ხედავთ რა მდგომარეობაში ჩააგდო სახელმწიფოს კუთვნილებაში მყოფი ავტომობილი. პოლიცია ამ ფაქტს მალავს, ავტომობილიდან მოხსნილია სანომრე ნიშნები, ცდილობდნენ მიეჩქმალათ ეს ფაქტი, თუმცა "ოცნების” შიდა გუნდიდან გამოსული ინფორმაციით, დადასტურებულად ვიცით, რომ კახეთის გუბერნატორი იყო მთვრალი. მივიდა თელავის კლინიკაში, სადაც ექიმებს მოატყუა თითქოს დაგორდა კიბიდან და იქ მიიღო მცირე დაზიანებები. მოვითხოვ შსს-სგან, გამოაქვეყნონ იმ კონკრეტული ფაქტის დროს ალკოტესტის შედეგები გუბერნატორის, სადაც უტყუარად დადასტურდება, რომ ალკოჰოლის ზემოქმედების ქვეშ იყო. ხალხის ფულით ჰქონდათ მიწყობილი ღრეობა და სახელმწიფო სახსრებთან ეს დამოკიდებულება აქვთ”, - აღნიშნა გიორგი ბოტკოველმა.