დავით ზალკალიანი - მივიღეთ ძალიან მკაფიო გზავნილი ნატო-ელი პარტნიორების მხრიდან - ერთხმად იყო აღნიშნული, რომ საქართველო პრაქტიკულად უკვე მოქმედებს, როგორც ალიანსის წევრი ქვეყანა

საგარეო საქმეთა მინისტრის დავით ზალკალიანის განცხადებით, დღევანდელი შეხვედრა საქართველოს პრემიერ-მინისტრსა და ნატო-ს გენერალურ მდივანს შორის იყო უაღრესად მნიშვნელოვანი და შედეგიანი.

საქართველოს საგარეო უწყების ხელმძღვანელის ინფორმაციით, შედგა კონკრეტული, დეტალური საუბარი იმასთან დაკავშირებით თუ რა ნაბიჯები უნდა გადაიდგას იმისათვის, რომ საქართველო დაუახლოვდეს ნატო-ში ინტეგრაციის პროცესს, განსაკუთრებით ბოლო დღეების განმავლობაში რუსეთის ფედერაციის მხრიდან მწვავე რიტორიკისა და ერთგვარი წინაპირობების წამოყენების ფონზე, იურიდიულ გარანტიებთან და ბუქარესტის სამიტის გადაწყვეტილებასთან დაკავშირებით.

„ჩვენ დღეს მივიღეთ ძალიან მკაფიო გზავნილი ნატო-ელი პარტნიორების მხრიდან. ნატო-ს გენერალური მდივანი იყო უაღრესად პირდაპირი და კონკრეტული და კიდევ ერთხელ აღნიშნა, რომ ნატო-ში ინტეგრაციის საკითხი არის უშუალოდ ნატო-ს და იმ ქვეყნის გადასაწყვეტი ვინც მიისწრაფის ნატო-სკენ. პირდაპირ გაკეთდა მინიშნება ნატოს წესდებაზე, კერძოდ ვაშინგტონის შეთანხმების მეათე მუხლზე, რომელიც პირდაპირ ამბობს, რომ ქვეყანა, რომელიც მიისწრაფის ნატო-სკენ, რომელიც აკმაყოფილებს კრიტერიუმებს, უნდა იყოს მიღებული ნატოში და ეს არის რა თქმა უნდა ნატო-ს და ამ ქვეყნის გადასაწყვეტი და არც ერთ მესამე მხარეს, მესამე ძალას არ აქვს უფლება ჩაერიოს ამ პროცესში. ეს გზავნილი დღეს ჩვენ ძალიან მკაფიოდ მოვისმინეთ" - აღნიშნა დავით ზალკალიანმა.

მისივე თქმით, ერთხმად იყო აღნიშნული, რომ საქართველო პრაქტიკულად უკვე მოქმედებს, როგორც ალიანსის წევრი ქვეყანა.

„ჩვენ მოვისმინეთ მკაფიო გზავნილები იმ პრაქტიკული თანამშრომლობის შესახებ, რომელიც გვაქვს, თუნდაც შავი ზღვის უსაფრთხოების კონტექსტში. ჩვენ მოვისმინეთ მხარდამჭერი გზავნილები ნატოს გენერალური მდივნის მხრიდან საქართველოს მიერ იმ პრაქტიკული ინსტრუმენტების შესრულების მიმართულებით, რაც ჩვენ გვაახლოებს ნატო-სთან და ერთხმად იყო აღნიშნული, რომ საქართველო პრაქტიკულად უკვე მოქმედებს, როგორც ალიანსის წევრი ქვეყანა" ,- განაცხადა საგარეო საქმეთა მინისტრმა.

ვიცე-პრემიერმა აღნიშნა, რომ ნატო-ს გენერალური მდივნის მხრიდან გაჟღერდა დიდი მადლიერება იმ წვლილისთვის, რომელიც საქართველომ გაიღო ავღანეთის ოპერაციაში მონაწილეობით და გლობალური უსაფრთხოების გამოწვევის, ტერორიზმის წინააღმდეგ ბრძოლაში. მადლიერება, როგორც ოპერაციის კომპონენტში, ისე ჰუმანიტარული პროცესის დროს, როდესაც საქართველოს გავლით ათასობით ავღანელი მოქალაქე იქნა გადაყვანილი მსოფლიოს სხვადასხვა ქვეყნებში.

„მე ვფიქრობ, რომ ეს კიდევ ერთი აღიარებაა იმ წვლილის, რომელიც ჩვენ შეგვაქვს გლობალური უსაფრთხოების წინააღმდეგ გამოწვევის ბრძოლის წინაშე" , - აღნიშნა დავით ზალკალიანმა.

რაულ ჩილაჩავა - აშშ რუსეთის პრეტენზიებზე მომავალ კვირაში გასცემს წერილობით პასუხს, ეს უკვე საინტერესოა, დაველოდოთ
პაატა დავითაია - ნეიტრალური პოზიციით ხელისუფლებამ  შესაძლოა,  ისეთი დარტყმები მიიღოს, რაც მას  სრულად ჩამოშლის
ქართული პრესის მიმოხილვა 20.01.2022
გიორგი კანაშვილი - უკვე გაჩნდა დაკვეთა სხვა პოლიტიკური კულტურის მქონე პოლიტიკოსებზე და დროა, პოლიტიკოსებმა ალღო აუღონ ახალ რეალობას
რუსეთის პოლიტიკური-სამხედრო დემარში:   მეტად კონკრეტულად ცალკეული ასპექტების შესახებ
"ავერსსა" და ეროვნულ ოლიმპიურ კომიტეტს შორის თანამშრომლობის მემორანდუმი განახლდა
„ლისი დეველოპმენტმა" International Property Awards-ზე უძრავ ქონებაში ორი ხუთვარსკვლავიანი ჯილდო მიიღო
PSP 2021 წლის „ლიდერ“ ბრენდად დასახელდა
მცირე და საშუალო ბიზნესების გაძლიერების პროგრამა BGROW დაიწყო
"სილქფესტი" მომხმარებლებს ორი დღით სასაუბრო და ინტერნეტ პაკეტებს შესთავაზებს!