გერმანიის კანცლერის, ოლაფ შოლცის განცხადებით, ზელიმხან ხანგოშვილის მკვლელობის საქმესთან დაკავშირებით რუსი დიპლომატების გაძევება მართებული გადაწყვეტილებაა.
„სრულიად სწორია, რომ საგარეო საქმეთა მინისტრმა ამაზე მკაფიო პასუხი გასცა“, - განაცხადა ოლაფ შოლცმა.
შეგახსენებთ, გუშინ გერმანიის სასამართლომ რუსეთის მოქალაქეს, 56 წლის ვადიმ კრასიკოვს, რომელმაც 2019 წელს, ბერლინის პარკში საქართველოს მოქალაქე ზელიმხან ხანგოშვილი მოკლა, სამუდამო პატიმრობა მიუსაჯა. განაჩენის გამოცხადების შემდეგ, გერმანიამ ორი რუსი დიპლომატი პერსონა ნონ გრატად გამოაცხადა. რუსეთის საგარეო საქმეთა სამინისტროს პრესსპიკერმა მარია ზახაროვამ განაცხადა, რომ საქმე პოლიტიკურად მოტივირებულია.