პრეზიდენტს აქვს მცდელობა, რომ მიაღწიოს თანხმობას მხარეებს შორის, შეიძლება ამით ისტორიაში შესვლა უნდოდეს, მაგრამ იცის „ქართული ოცნების“ პოლიტიკური ნება და ძალიან ფრთხილობს ნაბიჯების გადადგმას - პროცესები სწრაფად ვერ განვითარდება სამწუხაროდ, - ამის შესახებ „სტრატეგია აღმაშენებლის“ დეპუტატმა პაატა მანჯგალაძემ განაცხადა, რითაც პრეზიდენტთან გამართულ გუშინდელ საახალწლო მიღებას გამოეხმაურა.
მისი თქმით, არ აქვს იმედი, რომ „ქართული ოცნება“ მყისიერ ნაბიჯებს გადადგამს. მანჯგალაძე სამოქალაქო დაპირისპირების საფრთხეებზე საუბრობს.
„სამწუხაროა, რომ „ქართულ ოცნებაში“ არ არსებობს პოლიტიკური ლიდერი, რომელსაც ეყოფა პოლიტიკური სიბრძნე და დაინახავს იმ საფრთხეებს, რაც შეიძლება მოიტანოს პოლარიზაციამ და დაპირისპირებამ. ასე დიდხანს ვერ გაგრძელდება უსამართლოდ და უთანასწოროდ და ეს გამოიწვევს სამოქალაქო დაპირისპირებას. პრეზიდენტს აქვს მცდელობები, რომ მიაღწიოს თანხმობას მხარეებს შორის და შეიძლება ამით უნდოდეს შევიდეს ისტორიაში, მაგრამ იცის რა „ქართული ოცნების“ პოლიტიკური ნება, ძალიან ფრთხილობს ამ ნაბიჯების გადადგმას, ასეთი შთაბეჭდილება დამრჩა. ჩვენ აქცენტი უნდა გავაკეთოთ არა იმაზე, რა გვყოფს, არამედ იმაზე, თუ რა გვაერთიანებს და ყოველგვარი წინაპირობების გარეშე უნდა გადავდგათ ერთმანეთისკენ ნაბიჯები. ეს თუ არ გვსურს, მაშინ ისე უნდა მოვიქცეთ, როგორც იქცევა ირაკლი კობახიძე და დავაყენოთ წინასწარ პირობები და თავიდანვე ჩავშალოთ დიალოგი. მე არ ვარ ილუზიაში და არ მჯერა, რომ „ქართული ოცნება“ მყისიერად გადადგამს ამ ნაბიჯებს, პროცესები სწრაფად ვერ განვითარდება სამწუხაროდ,“ - განაცხადა მანჯგალაძემ.