აშშ-ის ხელისუფლება მხარს უჭერს გერმანიის ხელისუფლების ქმედებებს საქართველოს მოქალაქის ზელიმხან ხანგოშვილის მკვლელობის საქმეზე რუსეთის მოქალაქის ვადიმ კრასიკოვის განაჩენთან დაკავშირებით, - ამის შესახებ აშშ-ის სახელმწიფო დეპარტამენტის პრესსპიკერმა ნედ პრაისმა განაცხადა.
„მივესალმებით გერმანიის რეაგირებას ბერლინის სასამართლოს გადაწყვეტილებაზე, გაასამართლოს პირი მის ტერიტორიაზე ჩადენილი მკვლელობისთვის, რომელიც სასამართლოს დადგენილებით, რუსეთის სახელმწიფოს სასარგებლოდ განხორციელდა “,- წერს ნედ პრაისი „ტვიტერში“.
შეგახსენებთ, 15 დეკემბერს გერმანიის სასამართლომ რუსეთის მოქალაქეს, 56 წლის ვადიმ კრასიკოვს, რომელმაც 2019 წელს, ბერლინის პარკში საქართველოს მოქალაქე ზელიმხან ხანგოშვილი მოკლა, სამუდამო პატიმრობა მიუსაჯა. განაჩენის გამოცხადების შემდეგ, გერმანიამ ორი რუსი დიპლომატი პერსონა ნონ გრატად გამოაცხადა.