ყველა ქვეყანას აქვს უფლება გადაწყვიტოს საკუთარი მომავალი და საგარეო პოლიტიკა, გარე ჩარევისგან თავისუფლად, - ამის შესახებ თეთრი სახლის პრესსპიკერმა ჯენ ფსაკმა განაცხადა.

თეთრი სახლის პრესსპიკერის განცხადებით, შეერთებულმა შტატებმა რუსეთის მიერ შეთავაზებული წინადადებები ნახა და მის ევროპელ მოკავშირეებთან და პარტნიორებთან მოლაპარაკებებს გამართავს.

„ევროპის უსაფრთხოებაზე მოლაპარაკებები ჩვენი ევროპელი მოკავშირეებისა და პარტნიორების გარეშე არ იქნება“, - განუცხადა მან ჟურნალისტებს.

„ჩვენ არ დავთმობთ ძირითად პრინციპებს, რომლებზეც აგებულია ევროპული უსაფრთხოება, მათ შორის, რომ ყველა ქვეყანას აქვს უფლება გადაწყვიტოს საკუთარი მომავალი და საგარეო პოლიტიკა, გარე ჩარევისგან თავისუფლად“, - დასძინა მან.

ხუთშაბათს რუსეთმა განაცხადა, რომ მზადაა გაგზავნოს მთავრობის მხრიდან წარმომადგენელი "ნებისმიერ მომენტში", რათა დაიწყოს მოლაპარაკებები შეერთებულ შტატებთან უსაფრთხოების გარანტიების შესახებ, რომლებიც მას სჭირდება.

შეგახსენებთ, დღეს რუსეთის საგარეო საქმეთა სამინისტრომ ხელშეკრულებების ორი პროექტი გამოაქვეყნა, რომელიც ნატო-სა და აშშ-სგან უსაფრთხოების გარანტიების მიღებას ითვალისწინებს.