ძალიან ნაკლებად სავარაუდოა, რომ ლონდონმა და მისმა მოკავშირეებმა უკრაინაში ჯარები გაგზავნონ იმ შემთხვევაში, თუ რუსეთი იქ შეიჭრება,- „ევრონიუსის“ ინფორმაციით, ამის შესახებ გაერთიანებული სამეფოს თავდაცვის მდივანმა ბენ უოლესმა განაცხადა.

„უკრაინა არ არის ნატოს წევრი, ამიტომ ძალიან ნაკლებად სავარაუდოა, რომ ვინმე აპირებდეს ჯარების გაგზავნას უკრაინაში. არ უნდა მოვატყუოთ ხალხს, რომ ასე მოვიქცევით. უკრაინელებმა ეს იციან,“- განაცხადა უოლესმა და დასძინა, რომ ამის ნაცვლად, არსებობს მნიშვნელოვანი და გრძელვადიანი სანქციები, რომლებიც შეიძლება დაწესდეს კრემლის წინააღმდეგ.

ცნობისათვის, ხუთშაბათს გავრცელებულ ერთობლივ განცხადებაში, რომელსაც ხელი მოაწერეს უოლესმა და მისმა უკრაინელმა კოლეგამ, თავდაცვის მინისტრმა ოლექსი რეზნიკოვმა, ნათქვამია, რომ „გაერთიანებული სამეფო უკრაინელი ხალხის მხარდამხარ დგას და გააგრძელებს მათ მხარდაჭერას.“