ლონდონში ბელარუსის საელჩოს თავს დაესხნენ. ინციდენტის შედეგად ბელარუსელი დიპლომატი დაშავდა. ინფორმაციას ბელარუსის საგარეო საქმეთა სამინისტროს პრესსამსახური ავრცელებს.
ამავე ინფორმაციით, თავდასხმა 19 დეკემბერს საღამოს მოხდა.
შეტყობინებაში ნათქვამია, რომ ადამიანთა ჯგუფმა ჯერ შენობის ფასადი დააზიანა, შემდეგ კი შემთხვევის ადგილზე მისულ ბელარუს დიპლომატებს დაესხა თავს. ერთ-ერთი მათგანი მძიმედ დაშავდა და სასწრაფო სამედიცინო დახმარება დასჭირდა.
როგორც ინფორმაციაშია ნათქვამი, ბელარუსის საგარეო საქმეთა სამინისტროში დაიბარეს დიდი ბრიტანეთის საქმეთა დროებითი რწმუნებული, რომელსაც ინციდენტის საფუძვლიანი გამოძიების, დამნაშავეების პასუხისგებაში მიცემის, ასევე ბელარუსული მხარის საპროცესო მოქმედებების მიმდინარეობისა და მათი შედეგების შესახებ ინფორმირების მოთხოვნით მიმართეს.
ქვეყნის საგარეო საქმეთა სამინისტროს ინფორმაციით, დაშავებულ დიპლომატს ტვინის მსუბუქი შერყევა, ცხვირის მოტეხილობა და კბილის ტრავმული მოტეხილობა დაუდგინდა.
ადგილზე სამართალდამცავი ორგანოების მისვლის შემდეგ რადიკალებმა შემთხვევის ადგილიდან გაქცევა სცადეს, თუმცა ლონდონის პოლიციამ თავდამსხმელთა ნაწილი დააკავა. როგორც საგარეო საქმეთა სამინისტროში აზუსტებენ, დადგინდა, რომ „პირები სავარაუდოდ რადიკალური ემიგრანტული დაჯგუფების“ წევრები არიან.