უკრაინის საგარეო უწყების სპიკერის ინფორმაციით, უკრაინელი კონსულები გიგი კალანდაძის დაკავების მიზეზების დასადგენად და დახმარების აღმოსაჩენად მუშაობენ
უკრაინის საგარეო საქმეთა სამინისტროს სპიკერი ოლეგ ნიკოლენკო აცხადებს, რომ გერმანიაში დაკავებული გენერლის გიგი კალანდაძის დაკავების მიზეზების დასადგენად უკრაინელი კონსულები მუშაობენ.
სპიკერის თქმით, კალანდაძე უკრაინის მოქალაქეა და შესაბამისად, კონსულები უკვე თანამშრომლობენ გერმანელ სამართალდამცავებთან დაკავების მიზეზების დასადგენად და მისთვის საკონსულო დახმარების აღმოსაჩენად.
„გერმანიაში უკრაინის საელჩო ინფორმირებულია 19 დეკემბერს აეროპორტში უკრაინის მოქალაქის გიორგი კალანდაძის დაკავების შესახებ“, - განაცხადა ნიკოლენკომ.
ასევე კალანდაძის დაცვაში ჩართულია მისი იურისტიც.
გიორგი კალანდაძეს უკრაინის მოქალაქეობა 2019 წლის 20 დეკემბერს პრეზიდენტმა ვლადიმერ ზელენსკიმ მიანიჭა.
შეგახსენებთ, საქართველოს პროკურატურის ინფორმაციით, გერმანიის სამართალდამცავმა ორგანოებმა ბერლინის აეროპორტში საქართველოს სამართალდამცავი ორგანოების მიერ ძებნილი გიორგი კალანდაძე 2021 წლის 19 დეკემბერს დააკავეს. გიორგი კალანდაძე ე.კ.-ს თავისუფლების უკანონო აღკვეთისა და წამების ბრალდებით, საქართველოს სსკ-ის 143-ე მუხლის მე-2 ნაწილის „გ“ და მე-4 ნაწილის „ა“ ქვეპუნქტებით და 144-ე პრიმა მუხლის მე-2 ნაწილის „ა“ და „ბ“ ქვეპუნქტებით და მე-3 ნაწილით სისხლის სამართლის პასუხისგებაშია მიცემული.
როგორც უწყების განცხადებაშია ნათქვამი, საქართველოს გენერალური პროკურატურა გერმანულ მხარეს გიგი კალანდაძის საქართველოში ექსტრადიციის თაობაზე შუამდგომლობით მიმართავს.
v-if="article.gallery" v-html="article.gallery"
