თბილისში დაგეგმილ აქციას „ნაციონალური მოძრაობის“ მხარდამჭერები რეგიონებიდანაც უერთდებიან. ისინი დედაქალაქში ავტოკოლონებით გამოემართებიან.
„ნაციონალური მოძრაობის“ ავტოკოლონა უკვე წამოვიდა აჭარიდან.
როგორც აჭარის უმაღლესი საბჭოს "ერთიანი ნაციონალური მოძრაობის" წევრი გიორგი კირთაძე აცხადებს, ქართველი ერი მესამე პრეზიდენტის, მიხეილ სააკაშვილის პატიმრობას არ შეეგუება.
"ჩვენს ხმას, როგორც ქვეყნის შიგნით, ასევე გარეთ ბევრს გავაგონებთ. ქართველი ერი არ ეგუება მესამე პრეზიდენტის პატიმრობას", - განაცხადა გიორგი კირთაძემ.
ცნობისთვის, „ერთიანი ნაციონალური მოძრაობა“ საქართველოს ყოფილი პრეზიდენტის, მიხეილ სააკაშვილის გათავისუფლების მოთხოვნით 21 დეკემბერს, 18:00 საათზე რუსთაველის გამზირზე აქციას გამართავს.
როგორც „ინტერპრესნიუსს“ „ნაციონალური მოძრაობის“ ერთ-ერთმა ლიდერმა ზაალ უდუმაშვილმა განუცხადა, პარლამენტის შენობის მოპირდაპირე მხარეს მოეწყობა სცენა, საიდანაც გამომსვლელები აქციის მონაწილეებს სიტყვით მიმართავენ.