გერმანიის ჯანდაცვის მინისტრი კარლ ლაუტერბახი აცხადებს, რომ „ომიკრონ“ ვარიანტი გერმანიაში დომინანტური 3 კვირაში გახდება.
მისი თქმით, გერმანიას ვაქცინები, რომლებიც „ომიკრონ“ ვარიანტის წინააღმდეგაა მიმართული, მარაგში აპრილიდან ან მაისიდან იქნება.
„მასშტაბური "ბუსტერ" კამპანია არის ყველაზე მნიშვნელოვანი კედელი, რომელიც „ომიკრონის“ წინააღმდეგ საბრძოლველად ყველაზე ეფექტური საშუალებაა“ , - განაცხადა მან.
შეგახსენებთ, გერმანიაში, ფედერალური და რეგიონული ლიდერები კოვიდ შეზღუდვების გამკაცრებაზე შეთანხმდნენ. 28 დეკემბრიდან, კერძო შეკრებებზე 10-ზე მეტი ვაქცინირებული და ვირუსისგან გამოჯანმრთელებული პირის თავშეყრა იკრძალება. ქვეყანაში, რომლის მოსახლეობა დაახლოებით 83 მილიონია, 70.4% სრულადაა აცრილი, 32.6%-ს კი - „ბუსტერ“ დოზა მიღებული აქვს.