ჩრდილოატლანტიკურმა ალიანსმა რუსეთს მოუწოდა, კათოლიკური შობის წინა დღეს უკრაინის საზღვრებიდან ჯარები გაიყვანოს და ამით რეგიონში დაძაბულობა შეამციროს, - ამის შესახებ ნატო-ს გენერალურმა მდივანმა იენს სტოლტენბერგმა dpa-სთან საუბრისას განაცხადა.

ნატო-ს გენერალურმა მდივანმა გამოთქვა მზადყოფნა, ესაუბროს მოსკოვს „უსაფრთხოების გარანტიების“ მოთხოვნების გათვალისწინებით. ამავდროულად, მან ხაზი გაუსვა, რომ ალიანსი უარს არ იტყვის ცალკეული სახელმწიფოების ნატოში მიღებაზე.

„ჩვენ არ შეგვიძლია ეჭვქვეშ დავაყენოთ ნატოს უფლება, დაიცვას ყველა მოკავშირე, ისევე როგორც ძირითადი პრინციპი, რომ ყველა ერს აქვს უფლება აირჩიოს საკუთარი გზა“, - განაცხადა სტოლტენბერგმა.

მისი თქმით, რუსეთის პოზიცია გადაწყვიტოს, რა შეუძლიათ ან არ შეუძლიათ მის მეზობელ სახელმწიფოებს, ნიშნავს „გავლენის სფეროების“ კონცეფციის ხელახლა შემოღებას.

„ეს აბსოლუტურად ეწინააღმდეგება ყველაფერს, რაც უზრუნველყოფს მშვიდობასა და სტაბილურობას ევროპაში ცივი ომის დასრულების შემდეგ”, - განაცხადა სტოლტენბერგმა.