უკრაინის მახლობლად განხორციელებული ერთთვიანი წვრთნების შემდეგ 10 000-ზე მეტი რუსი ჯარისკაცი ბაზებზე ბრუნდება, - ამის შესახებ ინფორმაციას სააგენტო „ინტერფაქსი“ ავრცელებს.
„10 000-ზე მეტი სამხედრო მოსამსახურე წვრთნების ტერიტორიიდან მუდმივი დისლოცირების ადგილებისკენ გაემართება“, - განუცხადეს „ინტერფაქსს“ რუსეთის არმიაში.
სააგენტოს ცნობით, წვრთნები „უკრაინის მახლობლად მდებარე რამდენიმე რეგიონში, მათ შორის ყირიმში, როსტოვსა და ყუბანში“ ჩატარდა.
შეგახსენებთ, უკრაინის საზღვრებთან ათასობით რუსი ჯარისკაცის განლაგებამ კიევსა და დასავლეთის ქვეყნებში შეშფოთება გამოიწვია, რადგან გაჩნდა ეჭვი, რომ რუსეთი უკრაინის წინააღმდეგ თავდასხმას აპირებდა. რუსეთი ამ გეგმას უარყოფს და აცხადებს, რომ შეუძლია, საკუთარ ტერიტორიაზე ჯარი ისე გადაადგილოს, როგორც ამას საჭიროება მოითხოვს. სხვადასხვა შეფასების თანახმად, უკრაინის საზღვრებთან 60 000-90 000 რუსი ჯარისკაცია მობილიზებული.