აშშ-ის დაავადების კონტროლისა და პრევენციის ცენტრი კოვიდ 19-ით ინფიცირებული ჯანდაცვის მუშაკებისთვის იზოლაციის პერიოდს ამცირებს. მედიის ინფორმაციით, გადაწყვეტილების მიზეზი კორონავირუსის „ომიკრონ“ ვარიანტის გავრცელების გამო ჰოსპიტალიზაციის შემთხვევების მოსალოდნელი ზრდის ფონზე პერსონალის შესაძლო დეფიციტის თავიდან აცილებაა.

უწყების ახალი მითითებების თანახმად, კოვიდ-19-ით დაინფიცირებულ ჯანდაცვის მუშაკებს სამსახურში დაბრუნება შვიდი დღის შემდეგ შეუძლიათ, თუ მათ სიმპტომები არ აქვთ და კოვიდ ტესტის პასუხი უარყოფითია.

"იზოლაციის დრო შეიძლება კიდევ უფრო შემცირდეს, თუ პერსონალის დეფიციტი იქნება. ჩვენი მიზანია, შევინარჩუნოთ ჯანდაცვის პერსონალისა და პაციენტების უსაფრთხოება და თავიდან ავიცილოთ ჯანდაცვის დაწესებულებების ზედმეტი გადატვირთვა ", - ნათქვამია დაავადების კონტროლისა და პრევენციის ცენტრის განცხადებაში.

ამასთან, სხვა მოქალაქეები, რომლებსაც კორონავირუსი დაუდასტურდათ, 10 დღის განმავლობაში უნდა იყვნენ იზოლირებული. დაავადების კონტროლისა და პრევენციის ცენტრის რეკომენდაციით, სრულად ვაქცინირებულ პირებს, რომლებსაც დაინფიცირებულებთან შეხება ჰქონდათ, კარანტინის გავლა არ სჭირდებათ, თუ მათ სიმპტომები არ აქვთ. თუმცა, უწყება ასეთ პირებს კონტაქტიდან მე-5-მე-7 დღეს კოვიდ ტესტის ჩატარებას და დახურულ სივრცეებში პირბადის გამოყენებას ურჩევს.