ისევე როგორც წარმოდგენილი კანონპროექტი, დღეს წარმართული განხილვაც კიდევ ერთხელ ადასტურებს იმას, რომ ამ პროცესებს არაფერი აქვს საერთო ინსტიტუციის გაძლიერებასთან, - ამის შესახებ „ახალგაზრდა იურისტთა ასოციაციის“ თავმჯდომარე ნიკოლოზ სიმონიშვილმა განაცხადა.

მისი განმარტებით, აღნიშნული კანონპროექტი ერთადერთ მიზანს ემსახურება - კონკრეტული თანამდებობის პირების ჩამოშორებას და მათზე პოლიტიკურ თავდასხმას.

„ეს ხელოვნური დაშლა და დაყოფა ემსახურება კონკრეტული თანამდებობის პირების ჩამოშორებას და მათზე პოლიტიკურ თავდასხმას. ხელისუფლებას არ აქვს არავითარი სერიოზული არგუმენტი იმისა, თუ რატომ მიმდინარეობს ეს პროცესი ჩქარა და ამის ერთადერთი არგუმენტი არის ის, რომ დროზე სურთ რეალურად მათ ეს პრობლემა მოიშორონ, პრობლემა სახელმწიფო ინსპექტორის სახით. ეს განხილვები, ეს პროცედურები, ეს კანონპროექტები არის უპატივცემულობა სახელმწიფო ინსპექტორის სამსახურის, უპატივცემულობა ზოგადად ნებისმიერი დემოკრატიული პროცესის და იმას, რაც დღეს პარლამენტში ხდება, არაფერი აქვს საერთო დემოკრატიასთან, იმიტომ, რომ ეს კანონპროექტი არ აძლიერებს ინსტიტუციას, ჩვენ თუ ვსაუბრობთ ინსტიტუციის გაძლიერებაზე, აუცილებელია მის ფუნქციურ გაძლიერებაზე ვისაუბროთ და არა მის დაშლასა და კონკრეტული თანამდებობის პირების ჩამოშორებაზე, რა მიზანიც აქვს რეალურად ამ კანონპროექტს და ამით არაფერი არ შეიცვლება და, რა თქმა უნდა, ბევრად უარესისკენ წავა ყველაფერი,“- განაცხადა ნიკოლოზ სიმონიშვილმა.