პარლამენტის საგარეო საქმეთა კომიტეტმა დღევანდელ სხდომაზე არ განიხილა „ლელოს“ მიერ ინიცირებული რეზოლუცია საქართველოს ნატო-ში გაწევრიანებაზე. ამის შესახებ ინფორმაციას „ლელო“ ავრცელებს.

მათივე ინფორმაციით, 6-პუნქტიანი დოკუმენტი წინა ბიუროს სხდომაზე, ფრაქცია „ლელოს“ თავმჯდომარემ ბადრი ჯაფარიძემ გაიტანა და იქვე, უკვე ყოფილი პარლამენტის თავმჯდომარისგან, პირობაც მიიღო, რომ უახლოეს პლენარულ სხდომაზე დადგებოდა ეს საკითხი, დღეს კი კუჭავას თანაპარტიელებმა, ფრაქცია „ლელო - პარტნიორობა საქართველოსთვის“ ერთ-ერთი ლიდერის, სალომე სამადაშვილის მოთხოვნის მიუხედავად, NATO-ს შესახებ რეზოლუცია არ განიხილა.

„იმ ფონზე, როდესაც რუსეთი არამარტო უკრაინის ფრონტზეა გააქტიურებული, არამედ სრულიად ღიად და პირდაპირ მოითხოვს 2008 წლის ბუქარესტის სამიტის გადაწყვეტილების გადახედვას საქართველოსა და უკრაინის NATO-ში გაწევრიანების შესახებ, ასეთ დროს სრულიად წარმოუდგენელია საქართველოს პარლამენტს უფრო მნიშვნელოვანი პრიორიტეტი გააჩნდეს, ვიდრე ქვეყნის NATO-ში გაწევრიანებაზე მკაფიო პოზიციის დაფიქსირებაა.

აშკარაა, რომ „ქართულ ოცნებას“ სხვა პრიორიტეტები აქვს. ასეთ კრიტიკულ მომენტში, როდესაც საქართველოს სასიცოცხლო ინტერესები და უსაფრთხოება კიდევ ერთი დიდი კითხვის ნიშნის ქვეშ დგას, მმართველი პარტია დამოუკიდებელი ინსტიტუტების გაუქმებით და პოლიტიკური სადამსჯელო სპეცოპერაციებითაა დაკავებული. მმართველი გუნდი დღეს ამას უფრო მნიშვნელოვან პრიორიტეტად მიიჩნევს, ვიდრე ჩვენი ქვეყნის გეოპოლიტიკური კურსის დაცვასა და გამტკიცებას.

მინდა მათ შევატყობინო, რომ ევროპარლამენტარები, აშშ სენატისა და კონგრესის საგარეო კომიტეტების წევრები არიან ზედმიწევნით კარგად ინფორმირებული ფრაქცია „ლელოს“ მიერ ინიცირებული რეზოლუციის შესახებ საქართველოს NATO-ში გაწევრიანებაზე. იმედია, "ქართულ ოცნებას" პოლიტიკური ამნეზია ხელს არ შეუშლის გაიხსენოს, თუ რა არის ქართველი ხალხის 80%-ზე მეტის გეოპოლიტიკური არჩევანი და ჩვენი დასავლელი პარტნიორების მკაფიო მოლოდინი“, - აცხადებს პარტია „ლელოს“ ერთ-ერთი ლიდერი გრიგოლ გეგელია.