პარლამენტმა სამივე მოსმენით მხარი დაუჭირა ინიციატივას, რომლის საფუძველზეც საქართველოს პარტნიორი ქვეყნებისა და საერთაშორისო ორგანიზაციების სიმბოლოების შეურაცხყოფა ადმინისტრაციული წესით დასჯადი გახდა.

“ადმინისტრაციულ სამართალდარღვევათა კოდექსში“ ცვლილებები პარლამენტმა მესამე მოსმენით 81-ხმით, ერთხმად მიიღო.

კანონპროექტი მას შემდეგ მომზადდა, რაც 5-6 ივლისის აქციების დროს, პარლამენტის წინ აღმართული ევროკავშირის დროშა ორჯერ ჩამოხსნეს და დახიეს.

პროექტის მიხედვით, საჯარო დაწესებულების მიერ აღმართული/გამოფენილი ევროკავშირის, ჩრდილოატლანტიკური ხელშეკრულების ორგანიზაციის ან სხვა საერთაშორისო ორგანიზაციის, რომლის წევრიც საქართველოა, ოფიციალური სიმბოლოს შებღალვა ან საჯარო დაწესებულების მიერ აღმართული/გამოფენილი იმ სახელმწიფოს, რომელთანაც საქართველოს აქვს დიპლომატიური ურთიერთობა, დროშის ან გერბის შებღალვა, − გამოიწვევს ფიზიკური პირის დაჯარიმებას 1 000 ლარით.

იგივე ქმედების განმეორებით ჩადენა გამოიწვევს ფიზიკური პირის დაჯარიმებას 2 000 ლარით ან ფიზიკური პირის ადმინისტრაციულ პატიმრობას, 15 დღემდე ვადით.