ჩინეთის ქალაქ სიანში, სადაც კორონავირუსის შემთხვევების ზრდის ფონზე მკაცრი შეზღუდვები დაწესდა, საკვების დეფიციტია, - ამ ინფორმაციას მედიასაშუალებები ქალაქის მცხოვრებლებზე დაყრდნობით ავრცელებენ.
მედიის ინფორმაციით, მართალია ჩინეთის ხელისუფლება აცხადებს, რომ ქალაქში, სადაც 13 მილიონზე მეტი ადამიანი ცხოვრობს საკმარისი საკვებია, თუმცა ადგილობრივები პროდუქტების სიმცირეზე საუბრობენ.
მათი თქმით, პროდუქტების შესაძენად ყოველ მეორე დღეს გასვლის უფლება თითოეული ოჯახიდან მხოლოდ ერთ წევრს აქვს, თუმცა, მაღაზიების დახლებზე პროდუქტების ნაწილი ამოწურულია. 23 დეკემბერს კორონავირუსით დაინფიცირების შემთხვევების ზრდის გამო, ჩინეთის ქალაქ სიანის 13 მილიონ მცხოვრებს ქალაქის დატოვება აეკრძალა. ადგილობრივები სიანის დატოვებას მხოლოდ იმ შემთხვევაში შეძლებენ თუ დამსაქმებლისგან სპეციალური ნებართვა ექნებათ და ამასთან, კორონავირუსის ტესტის უარყოფით პასუხს წარადგენენ.
ადგილობრივი ხელისუფლების ცნობით, ამ დროისათვის ქალაქში „ომიკრონ“ ვარიანტის შემთხვევა არ დადასტურებულა.