აშშ-ში კორონავირუსით მილიონზე მეტი ადამიანი დაინფიცირდა, რაც მსოფლიოში აქამდე დაფიქსირებული ყველაზე მეტი შემთხვევაა. გასული 24 საათის განმავლობაში ქვეყანაში ვირუსი 1 080 211 პირს დაუდასტურდა. მედიის ინფორმაციით, დაინფიცირების შემთხვევების რეკორდული ზრდა კორონავირუსის „ომიკრონ“ შტამთან არის დაკავშირებული.

აშშ-ის ალერგიისა და ინფექციური დაავადებების ცენტრის დირექტორის, ენტონი ფაუჩის თქმით, ქვეყანაში ბოლო დღეებია ინფიცირებულთა რაოდენობა თითქმის ვერტიკალურად იზრდება, რაც საგანგაშო მაჩვენებელია.

ფაუჩიმ ასევე აღნიშნა, რომ ეს ჯერ კიდევ არ არის პიკის მდგომაროება და ინფიცირებულთა ახალი რეკორდი ქვეყანაში შესაძლოა კიდევ დაფიქსირდეს. პანდემიის დაწყების დროიდან აშშ-ში კორონავირუსის 57 მილიონზე მეტი შემთხვევა დაფიქსირდა, ვირუსს 848 000-ზე მეტი პირი ემსხვერპლა.