აქტივისტებმა ყაზახეთის ქალაქ ალმათის ტელევიზიისა და რადიო კომპანია „მირის“ ოფისი დაარბიეს, კომპანიის კუთვნილი აპარატურა კი გაანადგურეს, - ამ ინფორმაციას რუსული მედიასაშუალება RIA ავრცელებს.

მედიის ცნობით, „მირში“ შეჭრას მსხვერპლი არ მოჰყოლია, რადგან კომპანიის თანამშრომლებმა შენობის დატოვება დროულად მოასწრეს.

ქალაქ ალმათის კომენდანტის, ქანათ თაიმერდენოვის განცხადებით, საპროტესტო აქციების ფონზე ქალაქში ძარცვისა და მოროდიორობის არაერთი ფაქტი დაფიქსირდა.

მისი თქმით, აქტივისტებმა 120-ზე მეტი სატრანსპორტო საშუალება დაწვეს, მათ შორის 33 პოლიციის, სასწრაფო დახმარებისა და სახანძრო მანქანები იყო.

გასული ღამის მოვლენების ფონზე ქალაქში 500-ზე მეტი ადამიანი დაშავდა. ყაზახეთის პრეზიდენტმა ყასიმ-ჟომართ თოყაევმა ქვეყანაში საწვავის ფასის გამო დაწყებული საპროტესტო აქციების შემდეგ მთავრობის გადადგომის შესახებ გადაწყვეტილებას ხელი მოაწერა. ორ პროვინციაში ორკვირიანი საგანგებო მდგომარეობა გამოაცხადა.