ჩოგბურთელ ნოვაკ ჯოკოვიჩის ადვოკატები აცხადებენ, რომ სპორტსმენი 16 დეკემბერს კორონავირუსით დაინფიცირდა და ამის გამო, ვაქცინაციისგან თავისუფალია. BBC წერს, რომ შესაბამისი მასალები ადვოკატებმა სასამართლოში უკვე წარადგინეს.

ადვოკატების თქმით, ჯოკოვიჩმა დროებითი ვიზა მიიღო, ავსტრალიის ჩოგბურთის ასოციაციამ კი მას „ვაქცინაციისგან სამედიცინო გათავისუფლების“ ცნობა მიანიჭა.

ამასთან, 6 იანვარს ცნობილი გახდა, რომ სერბ ჩოგბურთელს ნოვაკ ჯოკოვიჩს ავსტრალიაში ვიზა გაუუქმეს, თუმცა სასამართლოს გადაწყვეტილებამდე ქვეყანაში დარჩება. ამის მიზეზი ავსტრალიის საზღვარზე ვაქცინაციის დამადასტურებელი საბუთის არქონა გახდა. ავსტრალიის ხელისუფლებამ თავდაპირველად მისთვის გამონაკლისის სახით ვიზა დაუშვა, თუმცა საზოგადოების მწვავე კრიტიკის შემდეგ გადაწყვეტილება შეცვალა.

ნოვაკ ჯოკოვიჩი მელბურნში 10 იანვრამდე დარჩება, როდესაც სასამართლო საბოლოო გადაწყვეტილებას მიიღებს.