ჟენევაში უსაფრთხოების გარანტიების შესახებ რუსულ-ამერიკული მოლაპარაკებები დაიწყო, - ინფორმაციას „რია ნოვოსტი“ ავრცელებს.
სააგენტოს ცნობით, შეხვედრა ამერიკის მუდმივი მისიის ტერიტორიაზე, გაერო-ს ოფისში დახურულ ფორმატში მიმდინარეობს. რუსეთის დელეგაციას ხელმძღვანელობენ საგარეო საქმეთა მინისტრის მოადგილე სერგეი რიაბკოვი და თავდაცვის მინისტრის მოადგილე ალექსანდრ ფომინი, ამერიკულ დელეგაციას კი - აშშ-ის სახელმწიფო მდივნის პირველი მოადგილე უენდი შერმანი.
შეხვედრამდე მხარეებმა წინასწარი მოლაპარაკებები სამუშაო სადილის ფორმატში გამართეს. რიაბკოვის თქმით, საუბარი რთული, მაგრამ საქმიანი იყო.
სერგეი რიაბკოვმა გუშინ „ინტერფაქსთან“ ინტერვიუში განაცხადა, რომ მოსკოვი მოლაპარაკებებთან დაკავშირებით ოპტიმისტურად განწყობილი არ არის. მან ასევე ხაზი გაუსვა, რომ ზეწოლის ქვეშ დათმობაზე არ წავლენ.
„ბუნებრივია, ჩვენ არ წავალთ რაიმე დათმობაზე ზეწოლის ქვეშ ან მოლაპარაკებების მონაწილეთა მუდმივი მუქარის ფონზე,“ - განაცხადა რიაბკოვმა.
ამასთან, მოლაპარაკებებამდე ერთი დღით ადრე აშშ-ის სახელმწიფო მდივანმა ენტონი ბლინკენმა განაცხადა, რომ რუსეთთან მოლაპარაკებების საკითხებში გარღვევას არ ელოდება. მისივე თქმით, მიუხედავად იმისა, რომ აშშ მზად არის მოსკოვის პოზიცია მოისმინოს, რთული იქნება პროგრესის მიღწევა, თუ რუსეთი არ განმუხტავს დაძაბულობას უკრაინის საზღვარზე.