ყაზახეთის პრეზიდენტმა ყასიმ-ჟომართ თოყაევმა განაცხადა, რომ მისმა ქვეყანამ სახელმწიფო გადატრიალების მცდელობა გადაიტანა, რომელიც კოორდინირებული იყო "ერთი ცენტრის" მიერ.

„კოლექტიური უსაფრთხოების ხელშეკრულების ორგანიზაციის“ ონლაინ შეხვედრაზე ვიდეო ჩართვისას თოყაევმა აღნიშნა, რომ ყაზახეთში წესრიგი აღდგა, მაგრამ "ტერორისტების" დევნა გრძელდება.

„არეულობის ტალღა სპონტანური პროტესტის საფარქვეშ დაიწყო. გაირკვა, რომ მთავარი მიზანი იყო კონსტიტუციური წესრიგისთვის ძირის გამოთხრა და ხელისუფლების ხელში ჩაგდება. საუბარია სახელმწიფო გადატრიალების მცდელობაზე. მთავარი დარტყმა მიმართული იყო ალმათის წინააღმდეგ. ამ ქალაქის დაცემა გზას გაუხსნიდა მჭიდროდ დასახლებული სამხრეთის აღებას, შემდეგ კი მთელი ქვეყნის ხელში ჩაგდებას. ისინი აპირებდნენ დედაქალაქის ხელში ჩაგდებას“, - განაცხადა მან.

ყაზახეთის პრეზიდენტის თქმით, ფართომასშტაბიანი "კონტრტერორისტული" ოპერაცია მალე დასრულდება. მისი მტკიცებით, ყაზახეთი მომხდარის შესახებ მტკიცებულებებს საერთაშორისო საზოგადოებას უახლოეს მომავალში მიაწვდის.