აშშ-ში კოვიდპაციენტების ჰოსპიტალიზაციის მაჩვენებელმა რეკორდულ ნიშნულს მიაღწია

შეერთებულ შტატებში ჰოსპიტალიზებული პაციენტების რაოდენობამ გასული დღის განმავლობაში რეკორდულ მაჩვენებელს მიაღწია, - ინფორმაციას Reuters-ი ავრცელებს.

გამოცემის ცნობით, აშშ-ში კოვიდ 19-ის დიაგნოზით 132 646 ადამიანია ჰოსპიტალიზებული, რაც აღემატება შარშან, იანვრის თვეში დაფიქსირებულ რეკორდს, როცა ჰოსპიტალიზებული პაციენტების რაოდენობამ 132 051 შეადგინა.

ჰოსპიტალიზაციის მაჩვენებელი სტაბილურად იზრდება დეკემბრის ბოლოდან, ბოლო სამი კვირის განმავლობაში კი - გაორმაგდა. „ომიკრონ“ ვარიანტის გავრცელებით გამოწვეული დაინფიცირების შემთხვევების ზრდამ აშშ-ის რამდენიმე შტატში ჯანდაცვის სისტემის გადატვირთვა გამოიწვია.

Reuters-ის ანალიზის თანახმად, დელავერში, ილინოისში, მეინში, მერილენდში, მისურში, ოჰაიოში, პენსილვანიაში, პუერტო რიკოში, აშშ-ის ვირჯინიის კუნძულებზე, ვერმონტში, ვირჯინიაში, ვაშინგტონსა და ვისკონსინში ბოლო დროს კოვიდ პაციენტების ჰოსპიტალიზაციის რეკორდულო დონე დაფიქსირდა.

აშშ-ში, ახალი შემთხვევების შვიდდღიანი საშუალო მაჩვენებელი ბოლო 10 დღის განმავლობაში გაორმაგდა და 704 000-ს მიაღწია. რაც შეეხება გარდაცვალების შემთხვევებს, აშშ-ში დღეში საშუალოდ 1 700 ადამიანი იღუპება.