ევროკავშირის უმაღლესი წარმომადგენელი უსაფრთხოებისა და საგარეო პოლიტიკის საკითხებში ჯოზეფ ბორელი უკრაინის წინააღმდეგ განხორციელებულ კიბერთავდასხმას გმობს და აცხადებს, რომ ევროკავშირის პოლიტიკური და უსაფრთხოების კომიტეტი და კიბერგანყოფილებები შეიკრიბებიან, რათა გადაწყვიტონ, რა რეაგირება მოახდინონ და როგორ დაეხმარონ კიევს.

"ვაპირებთ, მთელი ჩვენი რესურსის მობილიზებას, რათა დავეხმაროთ უკრაინას ამ კიბერშეტევის დაძლევაში. სამწუხაროდ, ვიცოდით, რომ ეს შეიძლებოდა მომხდარიყო. ძნელი სათქმელია ვინ დგას ამის უკან. ვერავის დავადანაშაულებ, რადგან მტკიცებულება არ მაქვს, მაგრამ ჩვენ შეგვიძლია მივხვდეთ,“- აღნიშნა ბორელმა.

შეგახსენებთ, უკრაინის სამთავრობო უწყებების ვებგვერდებზე მასშტაბური კიბერშეტევა განხორციელდა და გამოჩნდა მუქარა უკრაინელების მიმართ, რომ „ეშინოდეთ და ყველაზე ცუდს ელოდნენ.“ მედიის ინფორმაციით, ჰაკერული თავდასხმის ობიექტებს შორისაა: უკრაინის საგარეო საქმეთა სამინისტროს, განათლების და მეცნიერების სამინისტროს და მინისტრთა კაბინეტის ვებგვერდები. მუქარის შემცველი შეტყობინებები უკრაინულ, რუსულ და პოლონურ ენებზე გამოჩნდა. ვებგვერდების შავ ფონებზე გამოქვეყნდა უკრაინის დროშის, გერბის და რუკის გადახაზული სურათები.