გაერთიანებული სამეფოს პრემიერ-მინისტრის ოფისი დედოფალ ელისაბედ მეორეს ბოდიშს უხდის. BBC-ის ინფორმაციით, ოფისის წარმომადგენლების ნაწილი 2021 წლის 16 აპრილს, პრინცი ფილიპის დაკრძალვის წინა დღეს წვეულებას ესწრებოდა.
გამოცემის მიხედვით, მაშინ როდესაც ქვეყანაში მკაცრი შეზღუდვები იყო დაწესებული, ოფისის წარმომადგენლებმა მასშტაბური შეკრება გამართეს. როგორც ცნობილია, შეკრებას პრემიერ-მინისტრი ბორის ჯონსონი არ ესწრებოდა.
2 დღის წინ ჯონსონმა საზოგადოებას ბოდიში საჯაროდ მოუხადა, რისი მიზეზიც 2020 წლის 20 მაისს საჯარო წვეულებაზე დასწრება გახდა. ბრიტანეთის პარლამენტში სიტყვით გამოსვლის დროს მან აღიარა, რომ რეგულაციები დაარღვია და მასობრივ შეკრებაზე 25 წუთის განმავლობაში იმყოფებოდა. ბრიტანეთის ოპოზიციის წარმომადგენლები აღნიშნული შემთხვევების გამო ბორის ჯონსონის გადადგომას ითხოვენ.