აშშ-ის დაავადებათა კონტროლისა და პრევენციის ცენტრი კოვიდ 19-ით დაინფიცირებისგან დასაცავად პირბადეების ტარების მითითებებს ცვლის და რეკომენდაციას უწევს.

„ამერიკელებმა უნდა ატარონ რაც შეიძლება ყველაზე მეტად დამცავი პირბადეები. პირბადე არის საზოგადოებრივი ჯანდაცვის კრიტიკულად მნიშვნელოვანი ინსტრუმენტი კოვიდ 19-ის გავრცელების თავიდან ასაცილებლად“, - ნათქვამია უწყების განცხადებაში.

აშშ-ის დაავადებათა კონტროლისა და პრევენციის ცენტრის ვებგვერდზე განთავსებულ ინფორმაციაში აღნიშნულია, რომ მოქალაქეებს შეუძლიათ არჩევანი გააკეთონ ისეთ რესპირატორებზე, როგორიცაა N95s და KN95s. ამასთან, უწყებაში განმარტავენ, რომ ნებისმიერი პირბადე უკეთესია, ვიდრე პირბადის გარეშე სიარული.

შეგახსენებთ, მიმდინარე წლის მაისში, კორონავირუსით ინფიცირების შემთხვევების შემცირების ფონზე, აშშ-ის დაავადებათა კონტროლისა და პრევენციის ცენტრმა განაცხადა, რომ სრულად ვაქცინირებულ მოქალაქეებს პირბადეების გარეშე სიარული შეეძლოთ, ივლისში კი უწყებამ რეკომენდაცია შეცვალა და ვაქცინირებულ ამერიკელებს იმ რეგიონებსა და ტერიტორიებზე, სადაც ვირუსის გავრცელების მაღალი მაჩვენებელი იყო დაფიქსირებული, დახურულ სივრცეებში პირბადის ტარებისკენ მოუწოდა.