აშშ და ნატო მზად არიან რუსეთთან შეხვედრა კვლავ გამართონ და ორმხრივი დიალოგი გააგრძელონ, - ამის შესახებ აშშ-ის სახელმწიფო დეპარტამენტის განცხადებაშია აღნიშნული, რომელიც აშშ-ის სახელმწიფო მდივანს, ენტონი ბლინკენსა და ნატო-ს გენერალურ მდივანს, იენს სტოლტენბერგს შორის გამართული სატელეფონო საუბრის შემდეგ გავრცელდა.

„სახელმწიფო მდივანი ენტონი ბლინკენი ესაუბრა ნატო-ს გენერალურ მდივან იენს სტოლტენბერგს 12 იანვარს გამართული ნატო-რუსეთის საბჭოს შემდგომ მომდევნო ნაბიჯების განსახილველად, აშშ და ნატო მზად არიან კვლავ შეხვდნენ რუსეთს და მხარს უჭერენ დიპლომატიისა და ორმხრივი დიალოგის გაგრძელებას. აშშ და მისი ნატოელი მოკავშირეები ერთიანი არიან დიპლომატიურ გზაზე და მოუწოდებენ რუსეთს, დაუყოვნებლივ გადადგას ნაბიჯები უკრაინის წინააღმდეგ მისი მიმდინარე აგრესიის დეესკალაციისთვის“,- ნათქვამია სახელმწიფო დეპარტამენტის განცხადებაში.

შეგახსენებთ, გასულ კვირას სტრატეგიული სტაბილურობის საკითხზე აშშ-სა და რუსეთსა და ნატო-სა და რუსეთს შორის მოლაპარაკებები გაიმართა.