კულტურის სამინისტროც ყალიბდება სისტემად, სადაც კეთილსინდისიერება ნაკლია, ხოლო პროფესიონალიზმი დასჯადია. მთელი პროფესიული კაპიტალი, რაც კულტურის სამინისტროს დაქვემდებარებულ სახელოვნებო ორგანიზაციებში წლების განმავლობაში დაგროვდა, დიდი საფრთხის წინაშეა, - ამის შესახებ "ლელოს" ერთ-ერთმა ლიდერმა, მედეა მეტრეველმა განაცხადა, რითაც ის გამოეხმაურა კულტურის სამინისტროს მხრიდან დაწყებულ საკადრო ცვლილებების პროცესს.
მეტრეველი აღნიშნავს, რომ „საკადრო წმენდა, რომელიც ფრაგმენტულად 2019 წლიდან დაიწყო უკვე აქტიურ ფაზაში გადაიყვანეს“.
"სამსახურიდან ათავისუფლებენ ყველას, ვისაც აზრი მოეკითხება, ვინც თავის სფეროში ავტორიტეტია, ვინც პროფესიული კეთილსინდისიერებით წლებია ემსახურება თავის საქმეს და ქმნის მისაბაძ სტანდარტებს. ნათელია, რომ ხელოვნების მუზეუმში დაწყებული პროცესი მეტასტაზებივით სხვა ორგანიზაციებსაც გადაწვდება, რათა რეჟიმმა ბოლომდე დაიმორჩილოს ის თავისუფალი კუნძულები, რომლებმაც, თავიანთ დარგებში, დღემდე შეძლეს განვითარებაზე ორიენტირებული პროცესების შექმნა", - განაცხადა მეტრეველმა.