საქართველოს ტექნიკური უნივერსიტეტის სამშენებლო ფაკულტეტის სტუდენტები ქართულ-ამერიკულ კომპანიაში- CADesign, Inc გადასამზადებელ კურსებს გაივლიან, - ამის შესახებ ინფორმაციას საქართველოს ტექნიკური უნივერსიტეტი ავრცელებს.

მათივე ინფორმაციით, სტუ-ის სამშენებლო ფაკულტეტმა შესარჩევი კონკურსის ფარგლებში ჩატარებული გასაუბრების შედეგად, კურსებისათვის 15 სტუდენტი შეარჩია.

„ჩვენი ფაკულტეტის სტუდენტებისთვის გადასამზადებელი კურსების გავლა, ისეთ კომპანიაში, როგორიცაა CADesign, Inc, არის შესანიშნავი შესაძლებლობა მიიღონ პრაქტიკული ცოდნა, ხოლო კომპანიისთვის - მოიზიდოს ახალი კადრები. დარწმუნებული ვარ, რომ სწორედ პროფესიონალი კადრების არსებობა არის სამშენებლო დარგის განვითარების საწინდარი“, - აცხადებს სტუ-ის სამშენებლო ფაკულტეტის დეკანი, ზურაბ გვიშიანი.

საქართველოს ტექნიკური უნივერსიტეტის ინფორმაციით, სამშენებლო ფაკულტეტისა და ქართულ-ამერიკული კომპანია CADesign, Inc -ის თანამშრომლობა სტუდენტებს საშუალებას მისცემს გაეცნონ და დაეუფლონ სხვადასხვა ტექნოლოგიას, მათთვის საინტერესო სეგმენტში მოსინჯონ ძალები და პრაქტიკული მეცადინეობების შემდგომ, სასურველი მიმართულების პროფესია აირჩიონ.

კომპანია ტექნიკური უნივერსიტეტის საუკეთესო მოსწრების მქონე სტუდენტებს, არჩეული სპეციალობის მიხედვით გაანაწილებს და პრაქტიკული ცოდნისა და გამოცდილების შესაძენად, სათანადო პირობებს შეუქმნის. გადასამზადებელი კურსების გავლის შემდგომ, განიხილება უნივერსიტეტის სტუდენტთა კომპანიაში დასაქმების საკითხი.