უკრაინაში ამერიკის შეერთებული შტატებიდან სამხედრო დახმარების მესამე თვითმფრინავი ჩაფრინდა. ამის შესახებ უკრაინულ მედიას ქვეყნის თავდაცვის მინისტრის მოადგილემ ანა მალიარმა განუცხადა.

„საერთაშორისო ტექნიკური დახმარება ამერიკისგან უკრაინის შეიარაღებული ძალებისთვის უკვე უკრაინაშია. ამ დროისთვის „ბორისპოლის“ აეროპორტში აღნიშნულ პარტიას ხვდებიან კოლეგები თავდაცვის სამინისტროდან და ამერიკის საელჩოდან. ეს არის თანამედროვე აღჭურვილობა და თავდაცვისთვის განკუთვნილი საბრძოლო მასალები“ , - განაცხადა მინისტრის მოადგილემ.

ცნობისთვის, ამერიკამ ცოტა ხნის წინ უკრაინისთვის სამხედრო დახმარების სახით დამატებით, 200 მილიონი დოლარი გამოყო.

22 იანვარს უკრაინაში პირველი თვითმფრინავი ჩაფრინდა, რომელმაც თავდაცვითი დახმარების რამდენიმე პარტიიდან ერთ-ერთი პაკეტი ჩაიტანა.

მეორე პარტია ამერიკიდან უკრაინაში 23 იანვარს ჩაიტანეს, რომელიც მოიცავდა 80 ტონა თავდაცვით იარაღს.