შეერთებულმა შტატებმა საბოლოოდ ღიად განაცხადა, რომ ვაშინგტონს სურს რუსეთის პრეზიდენტი, რომელიც მართვადი და ლოიალური იქნება, - ამის შესახებ რუსეთის სახელმწიფო დუმის სპიკერმა ვიაჩესლავ ვოლოდინმა განაცხადა, რითაც ის აშშ-ის პრეზიდენტის, ჯო ბაიდენის კომენტარს გამოეხმაურა ვლადიმერ პუტინის წინააღმდეგ პერსონალური სანქციების დაწესების შესახებ.

“ყველაფერი თავის ადგილზე დადგა. აშშ-ის ხელმძღვანელობამ ღიად განაცხადა ის, რაც მას სურს: ვაშინგტონს სურს რუსეთის ლოიალური და მის მიერ მართვადი პრეზიდენტი", - წერს ვოლოდინი „ტელეგრამის“ საკუთარ არხზე.

მისი განცხადებით, რუსები მიიჩნევენ, რომ ეს სანქციები არა პუტინის, არამედ ქვეყნის მოსახლეობის არჩევანის წინააღმდეგაა მიმართული.

შეგახსენებთ, აშშ-ის პრეზიდენტმა ჯო ბაიდენმა განაცხადა, რომ თუკი რუსეთი უკრაინაში შეიჭრება, ის პრეზიდენტ ვლადიმერ პუტინის წინააღმდეგ პერსონალური სანქციების დაწესებას განიხილავს.