ყირგიზეთი და ტაჯიკეთი საზღვარზე ცეცხლის შეწყვეტასა და ერთობლივი პატრულირების განხორციელებაზე შეთანხმდნენ, - ინფორმაციას რუსული მედია ყირგიზეთის სასაზღვრო სამსახურზე დაყრდნობით ავრცელებს.

„მოლაპარაკებების დროს, მხარეებმა შემდეგ შეთანხმებებს მიაღწიეს : ცეცხლის სრულად შეწყვეტა, დამატებითი ძალებისა და საშუალებების გაყვანა და დისლოცირების ადგილებზე დაბრუნება, ბატკენ-ისფანას გზის გახსნა, კონფლიქტის პრევენციის მიზნით სასაზღვრო რეგიონებში ერთობლივი პატრულირება,“- აცხადებენ ყირგიზეთის სასაზღვრო სამსახურში.

გუშინ ცნობილი გახდა, რომ ტაჯიკეთ-ყირგიზეთის საზღვარზე ვითარება დაიძაბა და ორი ქვეყნის მესაზღვრეებმა ერთმანეთს ცეცხლი გაუხსნეს, რის შედეგადაც რამდენიმე ადამიანი დაშავდა. გავრცელდა ინფორმაცია ერთი გარდაცვლილის შესახებაც.

ყირგიზეთის სასაზღვრო სამსახურში განაცხადეს, რომ კონფლიქტის მიზეზი გახდა ტაჯიკი სამხედროების მიერ საავტომობილო გზის გადაკეტვა იმ მონაკვეთზე, რომელიც ყირგიზეთის ქალაქ ისფანას ქალაქ ბატკენთან აკავშირებს.