აშშ-ის პრეზიდენტი, ჯო ბაიდენი გერმანიის კანცლერს, ოლაფ შოლცს თეთრ სახლში უმასპინძლებს, - ამის შესახებ თეთრი სახლის პრესსპიკერმა ჯენ ფსაკიმ განაცხადა.
მისი თქმით, აშშ-სა და გერმანიის ლიდერების შეხვედრა 7 თებერვალს გაიმართება.
„შეხვედრაზე უკრაინის მიმართ რუსეთის აგრესიას განიხილავენ,“- განაცხადა ჯენ ფსაკიმ.
მისი თქმით, აშშ-ში ოლაფ შოლცის ვიზიტი „იძლევა შესაძლებლობას შეერთებულ შტატებსა და გერმანიას შორის ღრმა და მტკიცე კავშირების გასამტკიცებლად“.
„ისინი ასევე განიხილავენ მჭიდრო თანამშრომლობის გაგრძელების მნიშვნელობას მთელ რიგ საერთო გამოწვევებზე, ასევე ეკონომიკური კეთილდღეობისა და საერთაშორისო უსაფრთხოების ხელშეწყობის მიზნით,“ - აღნიშნა თეთრი სახლის პრესსპიკერმა.
აღსანიშნავია, რომ ოლაფ შოლცი პირველად შეხვდება აშშ-ის პრეზიდენტს მას შემდეგ, რაც მან გერმანიის კანცლერის თანამდებობა დაიკავა.