აშშ-ის სახელმწიფო დეპარტამენტმა მთავრობის თანამშრომლების ოჯახების ბელარუსიდან გაყვანის განკარგულება გასცა
შეერთებულმა შტატებმა ბელარუსში მყოფი აშშ-ის მთავრობის თანამშრომლების ოჯახებს ქვეყნის დატოვებისკენ მოუწოდა, - ინფორმაციას CNN-ი ავრცელებს.
„გაიცა განკარგულება, აშშ-ის მთავრობის თანამშრომლების ოჯახების წევრებმა ბელარუსი დატოვონ,“- ნათქვამია აშშ-ის სახელმწიფო დეპარტამენტის სამოგზაურო რეკომენდაციებში.
დეპარტამენტი ასევე აფრთხილებს აშშ-ის მოქალაქეებს, ბელარუსში არ გაემგზავრონ, რის მიზეზადაც "კანონების თვითნებურ აღსრულებას, დაკავების რისკსა და უკრაინის საზღვართან რუსული სამხედრო აქტივობის უჩვეულო და შემაშფოთებელ ზრდას“ ასახელებს.
„უკრაინის საზღვართან რუსული სამხედრო აქტივობის უჩვეულო და შემაშფოთებელი ზრდის გამო, აშშ-ის მოქალაქეებმა რომლებიც ბელარუსში იმყოფებიან, ან იქ გამგზავრებას განიხილავენ, უნდა იცოდნენ, რომ სიტუაცია არაპროგნოზირებადია და რეგიონში მზარდი დაძაბულობაა,“- აღნიშნულია აშშ-ის სახელმწიფო დეპარტამენტის რეკომენდაციებში.
