აშშ-ის გამოძიების ფედერალური ბიურო (FBI) ამერიკელ სპორტსმენებს მოუწოდებს პეკინის ზამთრის ოლიმპიადაზე საკუთარი მობილური ტელეფონები არ წაიღონ. FBI ამის მიზეზად კიბერუსაფრთხოებასთან დაკავშირებულ საკითხებს ასახელებს.

„სპორტსმენებს მოვუწოდებთ, დატოვონ საკუთარი მობილური ტელეფონები და ჩინეთში ყოფნისას დროებითი ტელეფონებით ისარგებლონ. ზოგიერთი დასავლური ქვეყნის ოლიმპიური კომიტეტი ასევე მოუწოდებს სპორტსმენებს ჩინეთში ყოფნის დროს მობილური ტელეფონები საერთოდ არ გამოიყენონ“, - წერია FBI-ის განცხადებაში.

გამოძიების ფედერალური ბიუროს ინფორმაციით, არცერთი ქვეყანა არ უქმნის ისეთ საფრთხეს ამერიკულ ინოვაციებსა და ეკონომიკურ უსაფრთხოებას როგორც ჩინეთი. პეკინის ზამთრის ოლიმპიური თამაშები 4-დან 20 თებერვლის ჩათვლით გაიმართება.