ალუდა ღუდუშაური - სააკაშვილის საკითხზე კომისიაში შეიძლება მივიღოთ კიდეც მონაწილეობა, რათა საზოგადოებამ ნახოს, რა ხდებოდა რეალურად ამ მტირალა ადამიანის თავს

ეს არის ტაკიმასხარაობა, სხვა არაფერი, რასაც ვხედავთ ოპოზიციის წარმომადგენლების მხრიდან, ამას არაფერი არ აქვს საერთო, არც უკრაინასთან და არც უკრაინელი ხალხის მხარდაჭერასთან, ეს არის პოლიტიკური კეკლუცობის კლასიკური ნიმუში, - ამის შესახებ „ქართული ოცნების“ დეპუტატმა, ალუდა ღუდუშაურმა „პალიტრანიუსის“ გადაცემაში „360 გრადუსი” განაცხადა.

მან ისაუბრა უკრაინის კრიზისის გარშემო „ქართული ოცნების“ ხელისუფლების პოზიციასთან დაკავშირებით ოპოზიციის კრიტიკის თაობაზე და განაცხადა, რომ გარკვეული დროის შემდეგ, ოპოზიციური პარტიების ნაბიჯებს პოლიტიკურ სახელმძღვანელოებში შეიტანენ, თუ როგორი არ უნდა იყოს პარტია და პოლიტიკოსი.

ალუდა ღუდუშაურის განცხადებითვე, ყველას კარგად ახსოვს „ერთიანი ნაციონალური მოძრაობის“ ნამოქმედარი.

„ეს არის ტაკიმასხარაობა, სხვა არაფერი, რასაც დღეს ვხედავთ მათი წარმომადგენლების მხრიდან. ამას არაფერი არ აქვს საერთო, არც უკრაინასთან და არც უკრაინელი ხალხის მხარდაჭერასთან. ეს არის პოლიტიკური კეკლუცობის კლასიკური ნიმუში. დარწმუნებული ვარ, როდესაც დრო გავა, პოლიტიკურ სახელმძღვანელოებში შეიტანენ მათ საქციელს, როგორი არ უნდა იყოს პოლიტიკური პარტია და პოლიტიკოსი. რა საერთო აქვს იმ აქტივობას, რასაც ახორციელებენ? - არანაირი. როდესაც ვსაუბრობთ პასუხისმგებლობაზე, არ უნდა დაგვავიწყდეს, აქ არის ძალიან მარტივი მოცემულობა: როდესაც გუნდს ახსენებთ, იქვე უნდა ახსენოთ „ნაციონალური მოძრაობა“ - ჩვენ ვართ ხელისუფლება, რომელსაც ხელისუფლების დროს არ დაუკარგავას ტერიტორიები, ქვეყანაში ომი არ ჰქონია და რაც მთავარია, ქვეყანას და საზოგადოებას მივეცით სტაბილური, მშვიდობიანი განვითარების შესაძლებლობა.

საზოგადოებამ კარგად იცის, ვინ არის ეს ხალხი: ამათი ნაომარიც კარგად ვნახეთ, დიპლომატია და რესურსიც - გონებრივი შესაძლებლობა, მოქმედება, პოლიტიკა, - 2008 წელს ყველაფერი ვნახეთ და ამის შემდეგ ჩვენი ასობით სოფელი დაიკარგა, ქვეყანამ დაკარგა ტერიტორია, მოქალაქეები და ჩვენი გმირი სამხედროების გვამები მიატოვეს ბრძოლის ველზე. შემდეგ ისიც გვახსოვს, როგორ მოაწერეს ხელი რეზოლუციას, რომლითაც პირდაპირ დადანაშაულებულია ქართული მხარე აგრესიული ომის წარმოებაში. ახლა ამ პოლიტიკურმა სვავებმა იპოვეს დრო და იყენებენ ამას იმისთვის, რომ თავიანთი დისკრედიტირებული, ნულს ქვემოთ ჩამოსული რეიტინგით ხალხს თავი შეახსენონ, როგორმე წამოიწიონ და დააინტერესონ“, - განაცხადა ღუდუშაურმა.

რაც შეეხება საქართველოს ყოფილი პრეზიდენტის, მიხეილ სააკაშვილის საქმეზე პარლამენტში საგამოძიებო კომისიის შექმნის საკითხს, ღუდუშაურის თქმით, „კომისიის შექმნა თვითმიზანი არ არის.“

„სააკაშვილის საკითხთან დაკავშირებით, თუ ასეთი რამ მოხდა, შეიძლება მივიღოთ კიდეც მონაწილეობა, რომ საზოგადოებამ ნახოს, ამ მტირალა ადამიანის თავს რეალურად რა ხდებოდა. ძალიან საინტერესო იქნება იმ ფაქტების გამომზეურება, რა ხდებოდა იმ დროს ციხეში და რა ხდება დღეს, როდესც მაღალი ხარისხის ფაფას მიირთმევს მოშიმშილე პრეზიდენტი“, - აღნიშნა ღუდუშაურმა.

რობინ დანიგანი - ვცდილობთ თუ არა ქართველი ხალხის დასანქცირებას? ცალსახად არა! ჩვენ გვსურს საუკეთესო ამ ქვეყნისთვის და გვსურს, რომ ეს ქვეყანა წარმატებული იყოს
ესტონეთის ელჩი - თუ გვინდა ევროკავშირის წევრობა, უნდა ვითამაშოთ წესების მიხედვით - საქართველოს ხელისუფლება ამბობს, რომ უახლოვდება ევროკავშირს, მაგრამ მათი ქმედებები ამას არ ადასტურებს
ალექსანდრე თვალჭრელიძე - ძალიან მინდა დავიჯერო, რომ ჩინური კომპანიის შერჩევა პროექტის განსახორციელებლად უბრალოდ გაუაზრებელი ნაბიჯია და არა პოლიტიკური ტრენდის შეცვლის შემაშფოთებელი ნიშანი
მწვანე განვითარების მხარდაჭერა თუ ხელის შეშლა - „ჭარბი საწარმოო სიმძლავრის“ თეორიის სიყალბე
„საქკაბელმა“ ბრონირებული NAYBY კაბელის წარმოება დაიწყო
4 რჩევა სამსუნგის ინჟინრებისგან თუ როგორ გამოიყენო Windfree კონდიციონერი ყველაზე ეფექტურად
ბათუმში „ლისი დეველოპმენტის“ ახალი პროექტის - ბუკნარის პრეზენტაცია გაიმართა
ქართული პრესის მიმოხილვა 20.06.2024