თეთრი სახლი აცხადებს, რომ ის აღარ აღწერს რუსეთის პოტენციური შეჭრის საკითხს უკრაინაში, როგორც "გარდაუვალს".
თეთრი სახლის პრესმდივნის ჯენ ფსაკის განცხადებით, აღნიშნული სიტყვა მან და სხვა მაღალჩინოსნებმა რამდენჯერმე გამოიყენეს, რამაც არასწორი მოსაზრება შექმნა.
"შემდეგ კი ჩვენ შევწყვიტეთ მისი გამოყენება, რადგან ვფიქრობ, რომ ამან გაგზავნა შეტყობინება, რომლის გაგზავნასაც არ ვაპირებდით - თითქოს ვიცოდით, რომ პრეზიდენტ პუტინს ჰქონდა მიღებული გადაწყვეტილება“, - განაცხადა პრესმდივანმა ჯენ ფსაკიმ ბრიფინგზე.
მისი თქმით, ის გულისხმობდა, რომ რუსეთს შეეძლო შეჭრა ნებისმიერ დროს და დასძინა, რომ "ჯერ კიდევ არ იციან, მიიღო თუ არა რუსეთმა გადაწყვეტილება".
როგორც მედია წერს, გადაწყვეტილება სიტყვა „გარდაუვალის“ გამოყენების შეწყვეტის შესახებ მას შემდეგ მიიღეს, რაც გაჩნდა წინააღმდეგობა აშშ-სა და უკრაინელ ოფიციალურ პირებს შორის იმის თაობაზე, თუ როგორ უნდა აღწერონ რუსეთისგან მომდინარე საფრთხე. გასულ კვირას, ფსაკის მიერ რუსეთის თავდასხმის, როგორც "გარდაუვალის“ აღწერამ კიევში შეშფოთება გამოიწვია. უკრაინის ოფიციალური პირები, მათ შორის პრეზიდენტი ზელენსკი, არ დაეთანხმნენ და განაცხადეს, რომ ამ აღწერილობამ შეიძლება გამოიწვიოს პანიკა და ეკონომიკური პრობლემები.
"საზღვარგარეთ არის განცდა, რომ აქ ომია. ეს ასე არ არის", - თქვა ზელენსკიმ გასულ პარასკევს პრესკონფერენციაზე.