თურქეთისა და სომხეთის სპეციალური წარმომადგენლები ურთიერთობების ნორმალიზების საკითხებში მოლაპარაკებების მეორე რაუნდს ვენაში 24 თებერვალს გამართავენ, - ინფორმაციას მედია საშუალებები თურქეთის საგარეო საქმეთა სამინისტროზე დაყრდნობით ავრცელებენ.
მოლაპარაკებების პირველი რაუნდი იანვარში მოსკოვში გაიმართა და მხარეებმა ის შეაფასეს, როგორც „პოზიტიური და კონსტრუქციული“. თურქეთმა და სომხეთმა ოთხშაბათს სტამბოლსა და ერევანს შორის ჩარტერული კომერციული ავიარეისები განაახლეს, რასაც ექსპერტები ურთიერთობების ნორმალიზებისკენ გადადგმულ მნიშვნელოვან ნაბიჯად მიიჩნევენ.
ცნობისათვის, თურქეთსა და სომხეთს დიპლომატიური ურთიერთობები 1990-იანი წლებიდან არ აქვთ. ქვეყნებს შორის სახმელეთო საზღვარი 1993 წლიდან ჩაკეტილია.